星期六, 1月 26, 2008

☆博多豆乳吐司☆―湯種

博多豆乳吐司―湯種


叫咗你無咁大個爐就唔好整咁大個吐司啦!你看!燒焦晒啦!點見人呢?


這又是一個警報了,焙爐雖然大,但就唔够高,真係要考慮買個再高啲的焙爐先得啦!


這次整得好大,大到頂到上焙爐頂,焙到10分鐘後就已經焦咗,要拿出用錫紙包着麵包先可以再焙,但都來不切了,焦晒、黑晒,無得救,最多無個皮食啦!


但雖然無外表,但勝在有內涵,好柔軟、好鬆柔,好有彈性,組織特別鬆軟,好好味呀!可以搽牛油、果醬拌食非常好味。三日.....三日都咁好味呀!


突然想,有部麵包機真好,搓麵糰又不用整到成個廚房都係粉,又可以預設發酵時間,當然有熱力幫助下不用擔心會否發起,如果你整緊嘢無時間都可以放在麵包機內等多一點都不怕,哈……哈……


溫馨提示:


1.      如果你們搓好的麵糰要用28℃的熱力幫助下作第一次發酵,但又沒有麵包機或焙爐預熱發酵幫助時,你可以用焙爐幫助,你先預熱焙爐約100-120度,最好用溫度計測試下爐頂的溫度,然後爐頂放上一個金屬架,再將包好的麵糰放在上面作第一次發酵。這樣就能有溫度幫助快些發酵了。





材料:12X 4寸半吐司模一個


a.     


高筋麵粉          540g


砂糖                  86g


                      8g


乾酵母              11g


b.     


全蛋                  86g


博多豆乳          113g


奶粉                  9g


湯種                  184g


c.    


 無鹽牛油          49g





步驟:


1.      ab材料放在盆中,但酵母不要與鹽及砂糖接觸,以免酵母脫水死亡,用手拌勻搓成有彈性及起根有薄膜的麵糰。(我用麵包機混合的,亦可用電動打蛋器搓)


2.      完成後加入c,搓至混合至完全光身及有彈性


3.      用保鮮紙包好放在28℃作第一次發酵約40分鐘至两倍大;(我用麵包機,所以有熱力幫助發酵)。★看溫馨提示


4.      拿出排氣搓圓後静止15分鐘,(室溫便可)


5.      再做型放入模中作最後一次發酵,在室溫下再發酵至八成滿,入爐180°焙35分鐘;


6.      立即脫模放涼。




請大家密切留意「酸味酵頭」的秘密


 



星期五, 1月 25, 2008

放假2天…


這两天放假,不能第一時間放上最新的食譜分享,但心中好想發表的,但在家中又只能打到文字,不能放相,真的好想換一部新的電腦,可以任意做相、放相、及記錄大量的分享呀!


昨天放假,下午約了MC一同相聚,相約了在尖沙咀,第一次見她,親切的外表,一眼望過去,好容易就互相認出,可能成個餅印,係喜愛整餅的印呀!哈……哈……


我們是旦的走上一間我們都是第一次去的樓上Café shop,環境清靜,這間餐廳好像基督徒開辦的,因為一眼就見到相識的傳福音單張及閱報,這間餐廳不算多人,可能已過了食午餐的時間,計算我們在內,只有两枱客,我們食嘢、傾計、真係咩都講,不過多數都是蛋糕麵包話題,不知不覺又四時多了,最後我們走去書店,又係我們相同的話題,看了一會,原先沒有想過買到書的,行過英文書籍那邊,哈……哈……平時原價是$90一本的蛋糕甜品食譜,而家減價賣$35一本,你見到都會心軟,必定會買呀!!我同MC都買了幾本,真係開心?


今次係MC主動約我的,話有嘢請我試食喎!沒有一早問她是什麼東東,留小小神秘感給大家,原來係過年必食的『馬蹄糕』,她真有心思,亦是第一次整,重包得好靚添,還有萬用利是封,過年最合用了。


MC是一位很好傾的blog友,做餅及麵包都好出色,亦好有經驗,今次真係令我好開心,因她的經驗教了我好多呀!她的一句名言『高處未尚高』,哈……哈……係呀!原來到處都係高手架……

她都好想有日一齊整餅,整下嘢食,希望°捃日要約多幾個高手一齊整先得。


°(----是搵的正字,响尖沙咀地鐵上蓋的廣告學的,哈…哈…)


大家密切留意稍後公報的相關相片呀!

亦密切留意『博多豆乳麵包-湯種』呀!

星期三, 1月 23, 2008

☆流心心太軟☆

流心心太軟


見到心太軟已經好想整,因為之前整過一次,但個心一啲都唔流,好似食一個朱古力蛋糕無咩分別,成日好想找一個真係心流的心太軟食譜,終於被我發現這個食譜,而且重整了出來添,這款流心心太軟不太甜,個心好流架。真係極好味呀!哈……哈……整定幾個在雪櫃,想食隨時可以拿出來焙返個,幾時都有得食。


不過就真係幾煩,煩多工具、多工序,整完個廚房好似打完仗咁,做的時候又要快手,又怕個心在雪櫃拿出會好快溶,幸好在冬天,如果在夏天一定未食已溶晒啦!







食譜要買書參考啦



又來blog聚@日本放題


FUNPUCCA發動,我們又來一次日本放題大食啦!相約了星期一,因為出來食野無咁多人,出席有Cindy Cindy ♡♡Katherine♡♡ sweet Irene,到了深水埗的「三和田---深水步元州街146-150號地舖」,一到就立即點嘢食,雖然是任食任飲,但我們只叫了一次就無再order,因為實在太多嘢食啦!係無可能食得晒!


不過魚生真的好新鮮,可惜種類不多,其他熟食都一般,任飲氣水,但無飲,想食蟹粥,因為實在太飽無食,想叫其他,但枱面及肚已經滿坐……,多謝每位$130


今次好開心,好似老朋友見面一樣,咩都講,好舒服,無壓力。好期待下次的相聚呀!


相機在黃橙下,在我手上總是影得不好,手震、好暗,真的一點都不好看。真係要好好認真學下影相先得啦!



大家都預備精美禮物,個個都大豐收呀!


FUNPUCCA就送出DIY美味的藍莓小蛋糕,原來係黑車厘子至真!


Cindy最愛卡通,所以送出的都是 Hello Kitty蛋糕模


 Cindy亦送出我們最愛玩的迷你蛋糕精品


sweet Irene就送出南生圍特產,花生糖及芝麻糖


我就沒有特別為她們預備食物,所以只有買了每人一排1848朱古力,


自己都忍唔住買了幾排慢慢食呀!


 


 



 


 



星期二, 1月 22, 2008

上了精選啦!

上了精選啦!


唔識得講咩,總之就好開心、好興奮、好感動。哈……


希望我的BLOG能帶比大家多啲智識,多啲學習,一同進步啦!


第一個發現的Blogger係何師奶呀!她成日講,你應該上精選啦!比你講中啦!哈……哈……



星期一, 1月 21, 2008

☆黑芝麻豆渣吐司☆―湯種

黑芝麻豆渣吐司湯種


好柔軟、好鬆柔,好有彈性,組織特別鬆而有彈性,而且好有芝麻的香味,而且亦好有益的吐司呀!可以搽牛油、果醬拌食非常好味。


溫馨提示:


1.      如果豆渣組織太大,可以與水混合後用攪拌機打碎才用。


2.      如果你們搓好的麵糰要用28℃的熱力幫助下作第一次發酵,但又沒有麵包機或焙爐預熱發酵幫助時,你可以用焙爐幫助,你先預熱焙爐約100-120度,最好用溫度計測試下爐頂的溫度,然後爐頂放上一個金屬架,再將包好的麵糰放在上面作第一次發酵。這樣就能有溫度幫助快些發酵了。


3.      你亦可以用黑芝麻或白芝麻。


4.      教你如何計算湯種比例,但要留意要用大熱水開,太少不能煮,會容易燒蕉。請看「65湯種的秘密」的方法。





材料:12X 4.5寸吐司模一個


a.     


高筋麵粉          410g


奶粉                  15g


砂糖                  40g


                      9g


乾酵母              10g


b.     


豆渣                  100g


                      100g


湯種                  156g(可用51計算)156g÷6=26;水―26g×5=130g;粉―26g×1=26g   )


c.       無鹽牛油          40g


d.      黑芝麻粉          40g(黑芝麻粒70g)





步驟:


1.      ab材料放在盆中,但酵母不要與鹽及砂糖接觸,以免酵母脫水死亡,用手拌勻搓成有彈性及起根有薄膜的麵糰。(我用麵包機混合的,亦可用電動打蛋器搓)


2.      完成後加入c,搓至混合至完全光身及有彈性後再加入d混合;


3.      用保鮮紙包好放在28℃作第一次發酵約40分鐘至两倍大;(我用麵包機,所以有熱力幫助發酵)。★看溫馨提示


4.      拿出排氣搓圓後静止15分鐘,(室溫便可)


5.      再做型放入模中作最後一次發酵,在38℃下再發酵至九成滿,入爐180°焙35分鐘;


6.   立即脫模放涼。


 



 


 


☆抺茶紅豆車輛吐司☆―湯種

這個湯種出來的麵包真係好柔軟,好有彈性,一個未影相已經被我同子曦爸瓜分了,瓜分的這個可能因模不完全覆蓋着,有超出車輛模的範圍,所以特別鬆柔,組織特別鬆而有彈性,而這個如車輛就因為被車輛模限制它的尺寸,就沒有再發大,所以大家預算分量時都要好準,但口感都可以接受,而且焙了出來第二日都咁柔軟。


子曦第二日見到這個圓型的包包都忍不住拿了在手,一定要食,而且還帶了回學校,子曦講:「帶返學校給小朋友食呀!」我話:「唔得喎!唔可以帶食物回校喎!」子曦講:「唔制!」我話:「好啦!」因好趕時間,我話:「不過回到學校門口要比返我喎!」子曦講:「好啦!」回到學校門口,當然拿唔到啦!因為這個車輛包,子曦老師下午就打來比我啦!


溫馨提示:


1.      如果你們搓好的麵糰要用28℃的熱力幫助下作第一次發酵,但又沒有麵包機或焙爐預熱發酵幫助時,你可以用焙爐幫助,你先預熱焙爐約100-120度,最好用溫度計測試下爐頂的溫度,然後爐頂放上一個金屬架,再將包好的麵糰放在上面作第一次發酵。這樣就能有溫度幫助快些發酵了。





材料:11條文圓形吐司模x2;亦可用普通模的。


 


a.     


高筋麵粉          237g


奶粉                  1大匙


入爐抺茶粉      3g


砂糖                  30g


                      3g


乾酵母              5g


b.     


牛奶                  100g


湯種                  78g


c.      


無鹽牛油          25g


d.     


密紅豆粒          100g(我用了50g罐裝紅豆容)


 





步驟:


1.      ab材料放在盆中,但酵母不要與鹽及砂糖接觸,以免酵母脫水死亡,用手拌勻搓成有彈性及起根有薄膜的麵糰。(我用麵包機混合的,亦可用電動打蛋器搓)


2.      完成後加入c,搓至混合至完全光身及有彈性後再加入d混合;


3.      用保鮮紙包好放在28℃作第一次發酵約40分鐘至两倍大;(我用麵包機,所以有熱力幫助發酵)。★看溫馨提示。


4.      拿出排氣搓圓後静止15分鐘,再做型放入模中,在室温下再發酵至八成後,加上另一半模。入爐180°焙30分鐘;


5.      立即脫模放涼。




 

在此多謝catfood.com 去國內旅行時幫我買這套模呀!多謝你!


大家密切留意黑芝麻豆渣吐司湯種」預告篇。