南丫島榕樹灣―索罟灣海鮮團

今個星期日返完教會崇拜後，就與子曦及子曦爸向南丫島出發，因為之前子曦爸與同事相約這天行山及食海鮮，選擇這地點是一點不難，加上天氣非常好，輕鬆又好舒服，全程約2小時，但我們選擇上了風力發電的大風車，來回要花多1.5小時。

首先到吉之島買一點午餐後坐地鐵到中環坐船到南丫島，本來諗着坐船子曦會午睡，但又食嘢，又看船，所以都沒有午睡了，下船再相約子曦爸的同事，原來都已經到了山頂，因他們早到食飯先行了，無計，唯有自己慢慢行啦！不久，子曦竟然扭眼瞓，都知有此一著，所以都帶備印尼揹帶，方便上肩頭，原先這是子曦爸的重任，可惜他前天打籃球整親舊傷，不能揹起子曦，唯有頂硬上啦！嘩……最初都無咩，一揹就揹着30磅人仔1.5小時，重要上山落山，重辛苦過當年行2日揹着大背包的『山頭霸王』，真係有點虛脫，腳都軟。不過感覺好溫馨，子曦重可以在我懷中睡着，睡得好甜，好像當日BB的時候，好喜歡抱他入懷，子曦2歲半了，他日再大一點，真係無力再揹起他，亦無咁溫馨，雖然而家成身軟晒，但這是直得回味的一刻呀！

上到風力大風車，真係好正，好大，好有勁力，當日有點風，所以風車不停的轉，在這裡坐了一會，看看人來人住，這裡好多外籍人仕居住，好有外國的風情呀！影相當然少不了，當然這刻我都沒有氣力再影相了，全部交晒比子曦爸。

不久又下山了，落山容易過上山呀！大家唔好忘記，子曦重未瞓醒，當時想，子曦瞓了見不到這巨大的建設，真有點失望了。

 

全程行了一大半，子曦重未瞓醒，但去到紅勝爺灣，我竟然要去洗手間，我真係勁，單手都可以去厠所，一去完子曦就瞓醒了，但他在我懷中不動聲色，眼望望，被我們發現時重响度暗暗咀笑添。終放可以脫險啦！

子曦全程都行不到1小時，不過他都好開心，跑山、落鈄路，重可以玩狗狗。

源路都好多美景，還有好多特色、特別的商店，這裡還有一個有機栽種，我用$13買了一包芥蘭。

到逹索罟灣，預備開飯，大家密切留意『美味海鮮宴』。待續……