早前買了好幾件鈎冷，亦有幾種顏色，上次鈎完幾件杯毯後就停了手，因為要鈎一張杯毯都要花幾個鐘，或有時錯了又要重新再鈎過，都幾費時呀！比起做一個蛋糕還要用好多時間及精神，但無理由買了咁多鈎冷就放响度，又浪費了它。某日看到一本鈎書及見到一些杯毯都是只鈎一條花邊，中間就用布配襯，所以今次就自己動手做下，雖然比之前快手，但長度計算真係要準確，如果不準，就不能两者配合了，你看！幾靚！重可以用不同顏色的花邊、花紋配不同的色布及花布，哈……哈……又多一樣嘢玩啦！
大家見到這隻花花杯嗎？它的尺寸就好似蛋杯一樣，但想講的是，這隻杯是我當年(N年前)去墨西哥時買的，墨西哥有好多人手做的陶瓷，好多都好靚，人手繪圖的，當年買了成箱寄返香港，一件都沒有打碎，安全到香港架。
下午3點3，又係其中出尖沙咀的目的，食壽司！因為星期一至五，下午2：30-5：00有半價呀！不過因為太多人等位，所以我們選擇行一會，打了一會兒免費賽車，之後才回去等位。
但今次好多都無貨，海胆、魚腩、和牛、咩魚都無，真係無上次咁好食呀！但都食了好多呀！多謝$23x呀！
最後行過新港中心，被我發現有雙妹嚜自助機，好有趣，立即用八逹通買了支“Lip Balm”呀！都係$28，不過就用晒我八逹通啲錢啦！要去增值！
最後到書店看看有沒有新書，一看就個幾小鐘，都係無買，因無咩書想買。
星期四10/1/08放假，子曦爸又放假，一早就約定會出尖沙咀食壽司，所以一早到鄰近的商店行了一會，買了一些有機食物，這間是新開的有機產品店，從外國入口，價錢有平有貴，但想介紹一下有樣嘢好特別，最特別係這樽「有機大豆醬」，可以搽麵包食，但最特別係當推銷員給我們品嚐一口時，真係好奇特，因為根本就係花生醬咁味道，及口感都一樣，就係無咗花生粒粒，早前都想買一樽花生醬，但又怕子曦咁早食花生會敏感，所以今次問店員有沒有花生醬，他就介紹這樽比我了，真好、真有趣。多謝$48.x。
另外買了「有機紅石榴糖」$10有3支，但他送多一支比我。
亦買了一盒早餐麥片，$30。全部都是買給子曦架。
之後到了尖沙咀，第一時間就是去特賣場，因為今次又係家品特賣，但無上次賣些物品咁靚，有部份就好似$10店搬了來咁，但就係好多嘢賣$9，底過$10店呀！亦有好多陳列品的東西，有部份都舊了少少，看看你好不好彩啦！但都有點係新貨，亦有食品，亦有精品。
新加坡公仔麵，$50有4大包，每包有4小包，最想買架原因係香港無呢啲味道呀！
呢两個嘢分別係$11及$10。
而相簿就$15(4R)，但回家看看，內層與簿皮分開了，要自己黏返好先用得！
呢個盒就係$9一個啦！
亦買了一套碗，都係$10。
你看我所買的，就知今次的貨色係………你自已想下啦！
如果大家都想看看，就不要錯過它的日期啦！
上星期日完了崇拜後回家放底些重擔後，與子曦及子曦爸一齊去單車徑放人仔，當子曦知道可以將這部放响家中一年多的hello kitty粉紅戰車駛落街時，真係「ki ki 聲」笑咗出來，見他好開心，到了單車徑，子曦見到好多小朋友都有開車，他就不停同那些小朋友講，「同你一樣呀！同你一樣呀！」
子曦不但pat pat不離粉紅戰車，而且重不被我們幫他推添，第一次駛車又點可以懂得自己駛呢？唯有在不經意下幫他一把啦！所以行得好慢、好慢。這天足足玩了成2個多小時，期間都有食下午茶，最後子曦都無精神了，因到了午睡時間，但他都不放棄，pat pat都係坐响粉紅戰車上，我們唯有同他講，「嗱！你坐响度，我們推你啦！」終放我們用正常的步伐快快回家啦！
哈……唔係亞媽的所為，而是子曦一歲生日的時候，有位嫂嫂一定要送部車仔比他，但買時無叮噹，個推銷員講，小朋友咩都無所謂啦！就係咁，呢部車遲遲都唔想帶落街囉！
好耐無買新書了，某天放假與子曦爸去了Mega Box 行了一會，目的只有一個，就是去看看這個又新又大的書店，嘩……真係幾大喎！而且重有好多不同類型的書籍，而自己當然不放過食譜啦，看了又看，想買的好多都買了，不想買的又無咩特別，但這次就買了两本主題蛋糕書，一本書講雪紡蛋糕的，而另一本就是講蛋糕卷架啦！看見這两本書又真係幾靚，好想做下內裡的蛋糕呀！
蛋糕卷從不成功，實在是咩原因呢？把心一橫就買本看看，而且又是「曾美子著」的，可惜，食譜竟然漏了部份步驟，如果唔係跟來做過，必定看不出呀！但都是一本好好的參考書。LESS 10% ON $98，多謝$88.2。
雪紡食譜家中都有幾本了，但這本不同的是裝飾得好靚，所以都買來參考下。LESS 10% ON $53，多謝$47.7。
☆意大利芝士杯 (Tiramisu)☆
家中還有一半Mascarpone cheese，亦就快到期了，所以唔食都要做了它，留在家中亦不能一二天消化它呀，將它帶回教會分給弟兄姊妹，嘩……一秒都分晒來食了，加上雜誌出了街，一傳拾，拾傳佰，就係咁，一時都接受唔到這個虛榮，但都只不過是過眼雲煙，不用太在意了！
這是一款極度容易做的芝士餅，而且亦非常好味，今次沒有用魚膠，只用了杯子。但在做雞蛋過程中要特別注意殺菌，大家要留意下啦！
溫馨提示：
1. 加熱蛋黃時要小心不要過熱及用細火，用手指測試到體溫後就離火繼續打法，小心煮焦，亦可用熱水坐着打起。
2. 浸手指餅時唔可以浸咁耐，但又要令到咖啡酒浸入餅內。
3. 手指餅亦可以用海綿蛋糕代替，但亦可以掃咖啡酒，不可浸得太濕呀！
成份:
5隻杯
意大利軟芝士 (Mascarpone cheese) 250g
蛋黃 2隻
砂糖 100g(可以少甜70g)
香蘭子精華 1/4茶匙
淡忌廉 2/3杯
手指餅 5條
咖啡酒漿：混合備用
特濃咖啡 1大湯匙
咖啡酒 3湯匙
白蘭地 1湯匙
裝飾：
可可粉 (Cocoa powder) 適量
步驟:
(1) 忌廉打起8成備用；
(2) 蛋黃加入砂糖坐於火爐上用最細火，加熱消毒，及用打蛋器不停打至變白，小心過熱，快手離火後加入Mascarpone芝士內用打蛋器拌勻；
(4) 再拌入打起的忌廉及加入香蘭子精華；
(5)倒入一半芝士忌廉糊放杯中，加入已浸上咖啡酒漿的手指餅，再倒入餘下一半的芝士；
(7)放進冰箱下層3小時，冷凍後蛋糕面灑上可可粉即完成。
