昨天，
老公下午放假接子曦放學，
因早放工，
所以特意叫他去這間麵包蛋糕店看看有沒有這個蕉糖布丁，
因之前見過ANGEL買過，
話早一點才會有，
遲了就會賣光，
好開心，
老公話有呀！
還買了2瓶回來，
重未食呀！
因要早上影張靚相放上來呀！
其實醉翁之意不在酒，
只在乎個瓶呀！
哈……哈……，死未，
$22買一個瓶，$44買2個瓶呀！
不過我相信賣得咁貴，
一定有他的道理，
今晚一定要細細淡食真D先得。
星期六, 8月 25, 2007
星期五, 8月 24, 2007
8月新書!!??!!
8月份買了這两本書，第一本書「五星級蛋糕甜點」$98，看過好多好多次都沒有買，因無咩特別，但上次BLOG聚與雪雪兔講過呢本書裡面有教一個用魚膠做的朱古力淋面的裝飾，另個朱古力面做出來是反光的，好靚架……
就係咁，看完就買了回家，為的是這個食譜呀！但看完後，裡面都教好多好食的甜點，但就要花時間去做啦！有時間，一定要跟來做一次呀！
另一本是做果醬的書，$48，呢本書亦是看了好耐，那時未開始研究果醬，所以沒有感動買，但最近發現果醬原來好受人歡迎，加上送禮自用都幾好喎！又想學下用什麼材料會更加好味，邊種果肉配邊種果肉係最好味的，而且原來這裡教的是好快好簡單的方法，不用花上好多時間。
而呢本書唔係我買架，是上次去朋友仔家做鐘點時，他借我看架，是他在公司唔知邊到買呀！定係邊樹拿回來，我都唔係好記得他講過咩嘢，總之就拿了回家先算啦！
嘩……你看，呢本書有咩特別，是介紹名店食家大師父的菜式，還有好多食譜呀！是飛機餐的食譜呀！
哈……哈……有機會都跟來做下，响家食下飛機餐都好呀！
★牛尾湯有機豆腐麵★
★牛尾湯有機豆腐麵★
昨天放假，帶了子曦返學校後，食了個靚早餐，亦遇上一位朋友食早餐，後來傾了半小時。他有他返工，我有我回家。
可能之前十分疲累，沒有多休息，加上早起身，變得有點沒精打彩，好像有些作感冒呀！回家後就瞓了三小時，都唔係太好，有點頭重重，所以食了二次的傷風感冒藥。
亦為自己煮了個無人食的有機豆腐麵，這個麵是前天做飯時留給老公，因實在太像豆腐皮，一點其他味道都沒有，就算有餸一齊食都唔係太好食，真係講得啱，越健康的食物，就越唔好食，所以放左响雪箱內，等了又等，等人家食它；不浪費食物的我，真係又愛又恨，點先至整得好食d呢？
有計，開罐牛尾湯煮個湯底咪得囉，嘩………好味呀！估唔到，一個無人要的有機豆腐麵，會轉一轉變得咁好味……真係好好味呀！
老公，你走寶啦！
星期二, 8月 21, 2007
做左人家的鐘點!!???!!
上星期日晚上相約一家人在他的家裡食飯，因大家都好耐無傾計相聚，當然大家都係附近住啦！不過去人家到食飯，又要我下廚，我都好耐無下廚了，不過大家都無咩要求，亦都是做來做去個幾樣，無咩難度呀！順便探下他的新成員，包包猫猫。
誰知，去到他家，諗着動手時，唔係做飯，而係同他洗煲洗碗，洗死人嗎？原來女主人去了北京學習一個月，男主人就自己照顧自己，可惜他又時常公幹唔在家，連個煮食爐都發左………酵，有好多毛毛呀！救命呀！當然又係我出手啦！
不過子曦都好開心，可以同包包玩，而且玩到唔知時間，晚上十一時先走呀！第二日返學唔肯起身呀！
心太軟+忌廉吉士醬
灰白的包包猫猫
我哋果日做了薯仔pizza，比上一次整的還要好食。
因用了美國焙薯，連皮一齊整。
又做了天使麵，用湯做底加材料入去做個汁，
簡單又好味，男主人下次你一個人就知道點整啦！
又整左雞翼，用酸辣醬汁做架，快又好味！
最後我都帶了一d蛋糕工具去他家做心太軟，這是第一次做的，看書時，覺得快手又容易整，而且又好好味，加上上次做了吉士醬又未食完，用來襯心太軟真係一流呀！不過就焙耐咗小小，個心唔係好軟呀！下次要快d收手先得。
因沒有預備，所以呢個心太軟沒有拍下過程，下次再做時先啦！
另做了一個藍莓芝士蛋糕拿去食，但因實在太飽，
無人食，每人拿了幾件要留返下慢慢次食。
不一樣的blog友8月生日聚會― 蠍
有幸得到 蠍 邀請相約她的blog友8月生日聚會，抱着高興、開心的心情應約，因知道今次的聚會會有12人出席，早幾天都諗帶什麼禮物送給她們呢？但又沒有時間預備，所以今次令大家失望了。
第一次見面，大家原來都已經好熟落，不停講嘢，當然除了我啦！原來之前大家都已經見過面了，而且原來她們是減肥一族，又不是做cake一族，變相話提又小了，但都好開心，知道她們另一面，愛笑、愛玩、愛食、點解減肥都愛食，其實她們都唔係好肥呀！不過女孩子個個都話要減肥囉。
今次食的地方係日本放提，你看！食物放到全枱都係，我影相都影到手軟，最後都放棄再影了，實在太多，而全場最好食的，當然唔係魚生，而係亞 蠍 為8月生日的blog友做的蛋糕啦！她好細心，做一個蛋糕都分開兩種味道，一半是原味海綿蛋糕，一半是綠茶海線蛋糕，“青蘋果熱情果慕絲蛋糕”，真係好味，好滑，因用了青蘋果，所以食落好似有一粒粒椰絲的口感，當然無椰絲咁大粒啦！而且個賣相相當好呀！有幸食到蠍的生日蛋糕，真係會不生難忘呀！
而亦有茜茜親手造的朱古力，不過忘記影相呀！我會補影放上來架啦！
而今次我都預備金錢與你們食餐飽，但當要附錢時，大家已經約定是要請8月生日的blog友，真令我好意外呀！又食又拿走，又不用比錢，真係唔好意思呀！在這裡真係要多謝大家呀！多謝晒你哋呀！
星期一, 8月 20, 2007
另一天空！！
上星期六與老公無聊走到油麻地上海街行下，誰知原來呢度有另一天空，喜歡做甜品蛋糕的朋友，你一去到這裡會特別興奮，因為你會發現有好多間是做批發零售用具器皿的店舖，雖然這條街不是太長，但你會每間走入去看看時，這樣原來都用上2、3小時，但零售都比起x記x記還平呀！如果是批發，你可以想像到，原來係好平架，不過人家都要店舖租金、人工。
當我們行緊的時候，老公講，似唔似某年去日本時，都走到一處專賣碗碗碟碟的街，我話好似呀！不過日本真係好大、好長。行一天都未必看得晒呀！
你看！我的戰利品。
你看呢個係咪呢架，咪就係放橄欖油及醋的樽囉，喜歡食沙律的我，都好想買一個呢樣的樽，但在外面賣得好貴，今次見到，平好多，又點可以唔買呢？多謝$40。
呢10個梳乎厘杯幾靚，而且是made in France，靚在是透明囉，重好平添。
8寸凍餅模及底片，都係$38及$16。
鋁模杯，細的買了4個，因鋁質好d，所以貴d，要$5.5一個；
而高d的鋁杯就平d，$3.5一個，之前响蛋糕店買了4個都要$7一個。
想走時，行行下見到呢間紅磚屋，好特別喎！起在一個大型私人豪華屋苑外，相比下，她額外特出呀！老公話呢間係以前的路露者之家呀！相信是想保留她，而起大型私人豪華屋苑時留下空間給她保存呀！
☆奇異果果醬☆
☆奇異果果醬☆
忙到不得了，買咗奇異果好耐都未用，諗着都是做奇異果醬的，就係忙，連奇異果都忘記了，如果唔用，它亦會爛掉而死亡了，所以都抽些時間做了這個奇異果果醬，但原來這個食譜都要用時間去製造，原因是要保持水果的鮮味，所以要用時間浸出水果果汁來煮果醬原材料，看看大家有沒有時間去嘗試呀！
溫馨提示：
1. 赴熱將果醬放入樽內，返轉樽放涼，會使內冷空氣收出，保持真空。或立刻放入熱水用細火煮30分鐘，就可令到有真空啦！
材料：
奇異果 750g
砂糖 250g
果膠 3g
砂糖 30g
檸檬汁 30g
肉桂粉 小許(1/8匙)
步驟：
1. 先將奇異果去皮切粒；
2. 放入砂糖浸2小時；
3. 然後用大火煮沸後加保鮮紙蓋着浸一晚；
4. 浸完後篩出果汁，
5. 用大火煮起加入果膠及砂糖煮起，收細火；
6. 再加入篩出的果肉，煮沸收火；
7. 再加入檸檬汁及肉桂粉攪拌拌勻；
8. 放入已經消毒的樽內保存。
訂閱：
文章 (Atom)