☆熱情果朱古力慕斯蛋糕☆(南國風情蛋糕)挑戰4個多小時(3)步驟篇

 

步驟：

一.    先做好酒糖液

將所有材料混合攪拌留用；

二.    杏仁朱古力蛋糕

1.      杏仁粉篩過，底筋粉及可可粉混合過篩；

2.      蛋黃、砂糖放入盆內用低速打混及企身約8成；篩入杏仁粉拌勻；

3.      蛋白加入白砂糖打至9成，將2用摺合式由底察面(Fold-in)混合，但要分三次加入，免泡泡消失；首先將1/3蛋白混合2，然後篩入1/3底筋麵粉+可可粉，然後再加入蛋白混合……重複做三次完成；

4.      加入牛油用用摺合式由底察面(Fold-in)混合，要快手，倒入平模後放入焙爐用205度焙6分鐘；

5.      放涼後分成两份，尺寸與空心模(內)一樣；

6.      底面塗上酒糖液。

三.    再做熱情果啫喱面

1.      先將魚膠粉與水混合，用微波爐叮10秒；

2.      混入熱情果汁中攪拌均勻；

3.      倒入一個放上保鮮紙的方型空心模中放平，放入雪櫃冷凍定型。

四.    熱情果慕斯

1.      義式混合蛋白：白砂糖加入蛋白中打起，座在細細火的火爐上加熱(約10秒)繼續打不要停手，加熱的作用是殺菌，但要小心及快手離火，再加入百香果拌勻；

2.      另一個鍋中加入果醬及香蘭子籽，加熱沸騰，再加入蛋黃及白砂糖混合，不停煮及不停用木棒轉動，免燒焦；

3.      在2中加入魚膠水(預先用水混合用微波爐叮溶)；攪拌後過濾。放在冰塊的缽冷卻呈膠狀。

4.      冷卻後加入所有的洋酒拌勻，再加入一部份打發8分的鮮忌廉攪拌後，再加入剩餘的鮮忌廉及義式混合蛋白；

5.      將4倒入已定型的啫喱面上；

6.      放一片已經塗上酒糖液的杏仁朱古力蛋糕，後再在另一面塗上酒糖液，放入雪櫃冷凍。

五.    朱古力歐蕾慕斯

1.      朱古力坐熱水溶化，放在室溫冷卻，加入已打發8分的忌廉攪拌均勻；再倒入模內；

2.      加上最後一片杏仁朱古力蛋糕；入雪櫃冷卻定型；

3.      定型後返過來脫模；再將熱情果鏡面膠塗上，最後加裝飾完成。

 

食譜來源：人氣蛋糕技術教本(原來份量係做4cmx6cmx3.5高 64件)

食譜沒有啫喱面，自己加上的。

在步驟上有小許改動。

 

 

 

 

☆熱情果朱古力慕斯蛋糕☆(南國風情蛋糕)挑戰4個多小時(2)食材篇

 

 

溫馨提示：

1. 熱情果 = 百香果。

2. 胡桃粉可轉用杏仁粉。

3. 食譜中的洋酒不是隨處買到，可用熱情果果汁加溫度橙酒代替。

4. 因部分都幾多，請按次序量好份量先做，再接下來做第二層食材，這樣無咁容易混亂。

5. 空心模一定要加保鮮膠紙，並一定要有片銅片承託着。

6. 糖酒液用完後有多不要浪費，可以加入熱情果慕斯裡。

空心正方模15.5cmx15.5cm(6寸) 分開大約8件 連銅片底(約8寸x8寸)

 

一.    杏仁朱古力蛋糕

蛋黃                 90g

糖粉                 45g(我用砂糖)

胡桃粉             31g(我不知是什麼，可能是合桃，但我轉用了杏仁粉) 。

混合蛋白

a. 蛋白                    94g

b. 白砂糖                33g

底筋麵粉                 30g

可可粉                     30g

溶化無鹽牛油         25g

 

二.    熱情果慕斯

義式混合蛋白

a. 白砂糖                        18g

b. 百熱情果醬                7g

c. 蛋白                            10g

熱情果果醬                     98g

香蘭子籽                        小許

蛋黃                                49g

白砂糖                            12g

魚膠粉                            3g(用1湯匙水拌勻，用微波爐叮10秒留用)

百香果味酒(passoa)       12g  (買唔到，所以用了熱情果果汁10g+2g溫度橙酒)

白萊姆酒(bacordi)          12g (買唔到，所以用溫度酒代替)      

35%鮮忌廉                     117g

三.    朱古力歐蕾慕斯

朱奶朱古力                     64g

35%鮮忌廉                     128g

四.    熱情果啫喱面

熱情果汁                         150g

魚膠粉                             2茶匙

凍水                                 1湯匙

五.    酒糖液

百香果味洋酒(passoa)    10g(我用了百熱情果果汁8g+2g溫度橙酒)

白萊姆酒(bacordi)           10g (我用溫度酒代替)  

百香果醬                         20g

☆熱情果朱古力慕斯蛋糕☆(南國風情蛋糕)挑戰4個多小時(1)分享篇

今次要向難度挑戰，因之前買了這本「人氣蛋糕技術教本」，書裡的蛋糕十分吸引，每一件都是日本大師名店的出品，閱覽後真係好想立即飛去日本食過夠本，但可惜只有看，不能食，連跟食譜做都有點困難，原因是這本食譜的份量是一間餅店的份量，不是做幾十件就係過百件，你叫人點跟來做呀！如果係做，都要有咁大個焙爐先得，淨係買食材都要幾百幾仟完啦！

把心一横，不如力力減減除開計一計嘗試做下，但自己的數學真係麻麻地，計來計去都計唔到，唯有請子曦爸計一計，又咩開方，又咩計比例，頭都大晒，終於交比子曦爸做啦！

當然，做出來的蛋糕唔知份量對不對，但都有個指引呀！今次呢個蛋糕，跟食譜做真係又長又多，淨係量份量都量咗好耐，加上要份層做，足足做咗我4個幾鐘，當然連洗用具及影相啦！但當我一路影相一路做時，竟然相機無電，連平時最傻瓜的相機都無電，好囉，可以習中精神專一做餅囉！唔好意思，在到熱情果慕斯頭一部份之後就無相啦！你哋自己用想像力去諗下啦！

呢果蛋糕原來出來個效果都唔錯。昨夜子曦爸又無得食，我話未影相喎，明天先啦！

 

其實心諗呢個蛋糕是想作為結婚週年紀念的作品的，十月就是與子曦爸結婚8週年啦！都好興奮及期待這天，之前子曦爸問我記唔記得，我話當然記得啦！他話我唔問你都唔記得啦！哈……哈……好似通常唔記得呢d日子的都是男士，但我就相返，要子曦爸提一提呀！不過，結婚紀念日又點可以唔記得呀！子曦爸………

今朝一早拿出來影相，子曦都被這個蛋糕吸引，分了两分，子曦已經自取一份放响自己面前，好期待咁等我影完相可以比他食，你看，他細細啖用個口品嚐，幾知味……。我當然都唔放過啦！一早唔係食早餐，而係品嚐呢個用了4個幾鐘的成果呀！嘩………好好味呀！好好味呀！有史以來做的熱情果蛋糕，呢果係最………好味呀！

大家如果唔厭煩，可以跟呢個已經分開的分量嘗試一下呀！

我都用咗好多時間打好呢個食譜，打咗好耐，整上來都好耐呀！

多多支持，多謝大家！

 

重陽節樂在吉澳&東坪洲

重陽節假日，教會舉行了180人的大旅行，當然，自己一定會參與，加上假日難得與家人一齊去旅行，實在是一件美事，而且亦是藉此旅行的機會，將福音帶到家人心中。而自己都邀請了爸爸參加，子曦爸就邀請了奶奶、家姐、姐夫及子曦表姐，媽媽因行動不方便，所以沒她份兒，而老爺亦是身體小問題，所以他亦沒有參與；子曦表姊都好耐無與子曦去玩了，他們一見面已經拖手仔，咁耐無見，已經十分開心。

 

但等坐船時，俩個都好無聊，呢將相就看晒啦！

在船上亦玩得好開心，子曦食粟米樣子都幾好笑，有一粒黏在氣球上，叫他不要食，他卻張開口好似扮食咁，還定格比子曦爸影相，誰知……一口食了粒粟米呀！

後來有個姊姊與子曦玩摺紙，摺了一隻船仔比他，他就玩到好似放飛機咁，還有個哥哥問他你坐船呀！子曦立刻放隻紙船在pat pat度，扮坐船仔呀！還講：係呀！

這天天氣好清涼，還有小小陽光，不太熱；而今次的旅行，首先到吉澳參觀及食一個好豐富的海鮮餐(張相要遲d放上)，之後就到東坪洲，吉澳這處地方好農村，比起大澳還要落後好多，而且要在馬料水坐船都要成1小時，吉澳有好多海產乾貨，好有特色的茶果，但老實講，一點都不好吃呀！亦處處都是破舊而且倒塌的房子，亦有好多好舊的、新建築的房子，當中只有一間返新的廟宇，廟宇前有一個棵大樹，這個吉澳就係這樣的東西了，但就好有遠離都市，接近大自然簡簡單單的心活都令人暫時放開繁忙的生活，回歸大自然的感覺呀！真都令人快樂。

食過海鮮餐後都1時正了，再坐船到東坪洲，由吉澳到東坪洲要1小時多，一到逹就感到 神的偉大，嘩……雖然之前來過，但都好期待再去尋找大大的岩石，最開心的都是我爸爸，他年紀雖大，但原來他是沒有來過，住在香港咁耐，原來好多地方都沒有去過，諗起他為了我們七個反豆星，都放棄了好多開心的機會。當然見到這景象，拿着D80的我，爸爸亦好似猴子咁，在岩石上跳來跳去，亦望着我手上的相機，當然係想話給我知，幫他拍照留意啦！各位，令次會放上老爸的第二張相給大家看，叫你們都與我分享他的快樂呀！

而東坪洲的岩石相片都在子曦爸手上未取到，有就快快送上呀！

 

 

☆香蕉腰果磅蛋糕☆

早前嘉露物語 做了Angel的香蕉核桃磅蛋糕，但問我點解用刀介開時會咁鬆散，我因為未做過，所以不能確實回覆她，而老公亦喜歡食香蕉蛋糕，所以就藉今次機會做一次，看看是什麼原因呢？

因為家中有两隻香蕉不大亦不細，用一隻又好似少得些，所以就改用两隻香蕉啦！更多香蕉肉！更有香蕉味！亦因為家中沒有合桃，所以我改用腰果，但大家最好用返合桃，因香口好多的。

亦因為要做同一款式的香蕉磅蛋糕，所以特意去$10店看看有沒有這款的模，因之前見過是有的，所以再去看看，$10一個真係好底，我一買就買了3個呀！還買了一個夾，用來夾熱騰騰的東西都唔錯呀！而且重係made in Japan呀!

溫馨提示：

模可預先掃上牛油灑上高筋麵粉，就可以容易脫模了。

用两隻香蕉出來的效果都幾好，沒有散的感覺呀！而且好有香蕉味！

中間做一條油坑，焙時真係開得好靚；但亦看書可以加一條牛油；亦可以放入焙爐後10分鐘取出再介一條坑再放回焙爐內繼續焙(但我未嘗試過這種方法，亦不知是否可行)。

 

 

 

食譜來源：Angel

材料：（8x21cm蛋糕模1個分量）我用8x18cm2個

熟透香蕉1隻(我用了2隻)、檸檬汁2茶匙、冧酒2茶匙、牛油100克、鹽少許、庶糖60克、蛋黃2個、蛋白霜料：蛋白2個、砂糖30克、合桃50克(我用了腰果)、低筋麵粉150克、發粉1/2茶匙、蘇打粉1/2茶匙。

預備：在模中鋪上牛油紙。牛油放在室溫中軟化。粉類過篩。合桃(腰果)烤過後切成粗粒。預熱焗爐170度。

做法：

1.用叉將香蕉壓碎，淋上檸檬汁和冧酒。

2.將牛油放入碗內，用木杓攪軟，加入蔗糖後用打蛋器打至起白色。將蛋黃逐個加入並攪勻，將1的香蕉加入去。

3.把蛋白放入另一個碗，加少許鹽打至起白泡，分兩次把糖加入。打成挺身的蛋白霜。

4.把過好篩的粉類的一半份量加入2中並攪勻，將3的蛋白霜的一半加入並攪勻。加入餘下的各種粉類，餘下的蛋白霜就分兩次加入，保持著起泡的狀態迅速利落地把整體攪勻，最後加入合桃(腰果)。

5.將糕糊倒入模中，用刮刀在中間劃一道痕跡，然後沿痕倒下少許植物油。形成油坑。用170度焗約45分鐘。焗完後脫模待涼。

 

 

 

 

 

 

 

 

沙田金沙日西料理

10月14日無意相約大佬及她女友一家一齊食飯，因為大佬係時時無咩嘢做，心血來潮就打來話今晚有無約人，時時都係星期日中午才打來，話今晚一齊食飯，你估他真係咁有心咩，係想見下個外甥之嗎？以前一齊住就話可以成日見，而家搬咗就想成日見，她女友話，唔見多D第時大咗唔肯跟你啦！又咁聽女友話呀下，所以咪成日打來囉，就算唔見到面都要聽下外甥把聲囉！

而今次就入了沙田，他們選了在7時30前入座《金沙日西料理》，點解要7時30分，因為在這時段入座可以有Set選擇，而且可以平D，一過7時半，就沒有Set囉，呢間日西都幾好味，我們選了2個set，因為小朋友多(都係4大人3小朋友)，所以無食咩魚生，熟食多d，但都一樣出色，特別是個『炸軟殼蟹蟹子沙律配洋蔥沙律汁 』呀！好大碟，好底食，而個『日式豬軟骨什菜鍋配手打烏冬』，豬軟骨好有味、好淋，手打烏冬彈牙，好好食，而且係有两碟添。

有興趣入一入去看看呀！

http://www.goldsands.com.hk/main.htm

www.goldsands.com.hk

電話：26688318

☆提子葵花籽麵包☆―失敗編(耐…)

☆提子葵花籽麵包☆―失敗編(耐…)

呢個就係因為沒有時間入爐焙的麵包。

星期四，一早就用麵包機搓好麵糰，等了3小時發酵，再落街諗着買少許食材，回家已經是4時了，再做分糰，再要第二次發酵20分鐘，再做型，又等成60分鐘，就係呢60分鐘，等唔切入爐就要趕着出門口接子曦放學，帶子曦到奶奶家，自己又要返學，就係咁，將個做起的麵糰放了入未開火的焙爐等最後一次的發酵，放學回家，足足等了5個半鐘，諗着立即開爐啦！

點知……

一焙，時間已經足夠，但一點都唔上色，重好似白麵糰，所以再加時間，出爐後，個面好硬，好似法包咁，當我剪開，內裡都好軟，但味道就帶酸，食第一件時感覺都幾好，但後來我都唔係太喜歡呢種酸味呀！但都食了三件就放棄咗，將全部送了比人了，人家喜歡嗎？

唔知點解個面會咁硬呢？

唔知點解會酸呢？

食譜無咩心機放上呀！不過都會放上來的，要等明天寫好先呀！比住d相大家看看先。

食譜來源：曾美子第一次教你整麵包