1號風球@船河慶生日

8月4日星期一早上掛起1號風球，心諗，還可以出海嗎？

但其實昨天退燒都唔好玩得咁盡，但約好晒，又預備了蛋糕啦！子曦又放暑假，出發啦！最多唔落水啦！

到了尖沙咀，見到好友，船亦來到，嘩……這輪船都幾大喎，都幾新，還有牀、有兩個洗手間、有冷氣房、有可以煮食的廚房添，這輪船係朋友公司，可供員工租借，重係唔使錢架，這間公司又幾好喎！還有船長、一名幫手及有姐姐清理，飲品還是免費任飲，食物就一個家庭帶一份，都幾好呀！

因為打緊1號波，所以都好清涼，因風大，不方便向東行，所以選擇了近西貢的一個沙灘落水，本來剛病好唔想落水，但見到個個都下水，子曦又無理由唔玩架，所以照玩，可惜無拿相機到沙灘，無得以留住子曦怕水怕沙的可愛場面，但最後都玩到濕晒，而我大半時間都在岸上及拿太陽傘，怕再晒親，但都有下水浸下身，可惜個日個身無掃太陽油，背脊都晒到紅晒呀！

這個沙灘好細，又人多，在海上都有10幾20輪船，真係暑假啦！咁多人都不用上班架……

玩了幾小時後回到船上梳洗，之後在船上休息，其實我都怕子曦玩得忘形跌了落水，成日叫住他，而子曦就在船板上玩蜘珠俠……笑死人呀！

子曦最愛藍色，所以勁愛這張彈彈牀(子曦形容)，所以在這裡玩到忘晒形……

一早安排了這晚食海鮮，因打風，所以到西貢用餐，船就開走呀！

食到一半，我發現自己真的又再發燒，今次真係晒親啦！發覺有啲發冷，是發燒的明顯徵兆，立即食粒退燒藥，成個人都無晒心機，連影食物都只係影到這款，食同影相都放棄了，這晚回到家中，瞓得不好，成晚好熱………

心諗！幣啦！第二天還要去澳門玩兩日添架………點算呢？